Lüüd, ik weer güstern dat eerste Mol dütt Johr wedder to een lütt Fröhschoppen int Eichhörnchen. Dor kunn man jümmers so vergnöögt platt snacken un dreep sik mit de ganzen “Danglöwen” to een lütt Sluudersnack! Oohmann, sünst an een Friedagmorgen weer de Kroog vull Minschen! An de Tresen kreegst kuum een Platz, de Buude vull Qualm un een luude Geschnöter full di an! Un güstern? Mi keem dat vör as wenn ik in een Aptheek keem! Reine Luft un een Kirl mit een Kaffee an de Theke!

Alle annern Lüüd drängeln sik in de lütt Bagalutenbuude, in de man noch smöken dörf, un weern vergrätzt över de Blöödsinn mit de Smökverboot in Kroog!!! Sölbst de Kaffeedrinker an de Tresen kunn sik ni doröver freun, dat he nu in “reine” Luft sitten, dorför aver ok mit keen Minsch snacken kunn!

Ob dat nu allns so richti is???? Nu köönt all de Nismökers in de Kroog gohn, dorüm sall dat Gesetz wull mokt worn sin, bloß wo sünd se??? Goht se villicht gorni in een Kroog? Wenn dat so is, denn is dat dore Gesetz doch reine Dummtüüch, oder watt meent ji dorto?

Bübi Gerdau